Украинскиот претседател Володимир Зеленски нема да ја посети Србија оваа недела. Наместо тоа, се очекува делегацијата на Украина во Белград да ја предводи Тарас Качка, вицепремиер за европски и евроатлантски интеграции, по претходните најави дека во текот на овие денови украинскиот претседател ќе престојува во Белград.
Според информации од проверени извори, посетата на Зеленски на Белград првично била планирана за четврток на 21 мај, но истата е одложена во последен момент. Првичните најави за доаѓањето на украинскиот претседател во Србија биле сигурни, но подоцна станало јасно дека патувањето нема да биде реализирано во планираниот термин поради специфични причини. Посетата сепак би можела да се случи наскоро, но новиот датум ќе биде познат дури во последен момент.
Евентуалното доаѓање на Зеленски во Белград отвора и сериозни прашања за политичките ефекти, особено низ призмата на односот на Србија кон војната во Украина и перцепцијата за нејзиниот исход. На политички план, во анализите јавно се поставува дилемата:
„Ако сте претседател на Србија и очекувате победа на Русија, дали би го угостиле Зеленски во Белград?“
Како што се наведува во анализите, истото ова прашање би можело да се постави и во обратна насока. Досега, контактите меѓу претседателите на Србија и Украина главно се одвиваа во текот на меѓународни политички самити. Од почетокот на војната во Украина, српскиот претседател еднаш ја посети Украина на 11 јуни 2025 година во Одеса кога се одржа Самитот Украина – Југоисточна Европа.