Актуелните градски проекти, рамномерниот развој и соработката со меѓународните институции биле во фокусот на денешната средба во главниот град, соопштија од Град Скопје.
Имено, градоначалникот Орце Ѓорѓиевски денеска оствари официјална средба со постојаниот координатор на Обединетите Нации во земјава, Рита Колумбиа.
Како што информираше Ѓорѓиевски преку социјалните мрежи, ова е нивна втора средба на која се отворени неколку клучни прашања за функционирањето на градот.
„Разговаравме за тековните проекти на Град Скопје, кои се насочени кон рамномерен и одржлив развој на сите градски населби, со посебен фокус на подобрување на квалитетот на живот на граѓаните“, истакна тој.
За време на разговорот со високата претставничка на ОН, станало збор и за енергетската ефикасност на јавните институции и инклузивноста на граѓаните.
„Отворивме и важни теми, поврзани со поголемо користење обновливи извори на енергија во јавните објекти, како и создавањето услови за еднакви можности за граѓаните со попречености“, додава градоначалникот.
Освен тековните активности, двајцата соговорници ги лоцирале и идните полиња на кои Град Скопје и Обединетите нации можат заеднички да дејствуваат, пред сè во сфера на социјалниот живот.
Посебно внимание било посветено на поттикнувањето на волонтерството кај граѓаните, како и на механизмите за поголемо вклучување на младите во процесите и одлуките важни за развојот на градот.
„Верувам дека ваквата соработка може да донесе конкретни резултати за Скопје како град што се развива рамномерно, одговорно и со грижа за секој граѓанин“, заклучи Орце Ѓорѓиевски.