Со новите најавени измени на Предлог-законот за игри на среќа и за забавните игри се очекува да се стесни кругот на игрите на среќа, најави денеска министерот за економија и труд, Бесар Дурмиши.
Како што појасни министерот, примарната цел на овие законски измени е воведување ред во оваа индустрија и заштита на младата популација.
„За првпат носиме закон за предлог измени на Законот за игри на среќа со којшто се предвидува 500 метри оддалеченост (на казината) од основните и средните училишта. За првпат ќе има ред, поголема заштита на јавниот интерес, особено кога се работи за младите“, рече министерот за економија.
Дурмиши потенцираше дека ограничувањето од 500 метри не е политичка мерка, туку заштитна мерка со која се поставуваат јасни правила на пазарот.
„Сме поставиле јасни правила бидејќи нема да дозволиме комарот да се рекламира како брз начин за да се збогатат или лесна заработка, особено во содржините кои влијаат кај младите. Целта е јасна – да се стави голема контрола и европски стандарди во борбата против оваа индустрија“, рече тој.
Дополнително, со предлог-измените се очекува да се забранат и електронските игри на среќа бидејќи, како што посочи министерот, младите многу брзо можат да стигнат до нив.
„Како владин кабинет ќе сме против ова се додека кога целосно ќе ги отстраниме од нашата земја. И тоа го правиме. Првично, измените се првиот чекор. Го стеснуваме нивниот круг, ги оддалечуваме од местата каде што се младите и ги ограничуваме рекламирањето“, изјави министерот.
На прес-конференцијата, Дурмиши се осврна и на економските политики и плановите на Владата за зголемување на животниот стандард и платите во државата.
„Со помош на колективните договори сме постигнале да ги зголемиме платите за да влијаеме во зголемување на продуктивноста во јавниот сектор, потоа да се зголеми минималната плата во приватниот сектор. Со Оперативниот план и со Законот за финансиска поддршка на инвеститорите со сите механизми. Ги поддржуваме приватниот сектор, стопанските комори и да создадеме подобри услови за вработените и тие да ја зголемат продуктивноста, истовремено ќе се зголеми и минималната плата. на ова сме посветени и работиме секој ден“, заклучи Дурмиши.