Со читање на сведоштвата на две девојки денеска продолжи судењето за катастрофалниот пожар во дискотеката „Пулс“ во Кочани. Една од преживеаните во својот исказ посочи дека објектот редовно работел без контрола на документи и без обележани противпожарни излези.
Таа наведе дека критичната вечер во дискотеката биле користени пиротехнички средства за време на настапот на групата ДНК.
„Пожарот го забележав откога друг присутен викна дека ‘се запалило’, по што настана паника и турканица кон единствениот излез што го знаев“, се вели во нејзиниот исказ.
Девојката опиша дека на скалите и кај главната врата се создал огромен метеж, по што била извлечена од други лица и пренесена во болница поради вдишан чад и повреди.
На денешното рочиште беше прочитана и изјавата на вработена во кафетеријата на сопственикот, која во пожарот ги изгубила дечкото и блиски пријатели.
Одбраната на обвинетите се спротивстави на овие докази, тврдејќи дека девојките имале „душевно растројство“ според вештачењата. Обвинителството, пак, побара исказите да се прифатат за да се избегне дополнителна виктимизација на жртвите.
Судењето за трагедијата од 16 март 2025 година го води судијката Дијана Груевска-Илиевска, а го застапува тим од 15 јавни обвинители.