Членот на Извршниот одбор на СДСМ, Петар Огњеновиќ, денеска од пред студентскиот дом „Гоце Делчев“ упати остри критики до власта, обвинувајќи за негрижа и распад на студентскиот стандард. Според него, студентите се соочуваат со понижувачки услови додека парите се трошат на други намени.
Огњеновиќ истакна дека симболот на студентскиот живот е претворен во симбол на распад на системот.
„Додека криминалците на власт лапаат пари од криминални тендери, за младите студенти се оставени без основни услови, немаат топла вода, немаат соодветна храна, глувци им се шетаат по собите. Ова е понижување а не достоинствен живот“, изјави Огњеновиќ.
Тој ја обвини владата на Мицкоски дека намерно ги блокира европските процеси, што според него директно влијае врз иднината на младите и ги принудува на иселување.
„Наместо европски студентски стандард, модерни кампуси и услови какви што имаат младите во Европа, македонските студенти добиваат мувла, студени соби, мувла и распаднати тоалети. Ова е последица на една криминална власт“, истакна претставникот на СДСМ.
Опозициската партија порача дека младите не прифаќаат чекање со децении за влез во ЕУ и бараат парите од буџетот да одат за студентскиот стандард наместо за бизнис интереси.