Градоначалникот на општина Гази Баба, Бобан Стефковски, изрази сериозна вознемиреност по немилиот настан во училиште во населбата Ченто, каде ученик од деветто одделение бил повреден од свој поранешен соученик.
„Со жалење и сериозна вознемиреност ја примив информацијата за немилиот настан кој се случил во училиште во Ченто, каде што еден поранешен ученик кој минатата година го завршил своето образование во ова училиште, дошол и повредил ученик од девето одделение.
Во разговор со членови на семејството на повредениот ученик информиран сум дека детето е во добра здравствена состојба и се наоѓа на болничко лекување.
Лицето кое го извршило нападот е обезбедено од страна на Министерството за Внатрешни работи.
Како градоначалник на општина Гази Баба изразувам најостра осуда на ваквиот чин. Насилството не може да се оправда со ништо.
Општина Гази Баба, останува во постојана координација со надлежните институции кои превземаат мерки за целосно расчистување на случајот“, напиша градоначалникот Стефковски.