Министерот за надворешни работи и надворешна трговија, Тимчо Муцунски, денеска во Братислава учествуваше на министерскиот состанок на Групата „Пријатели на Западен Балкан”, на покана на словачкиот министер за надворешни работи, Јурај Бланар.
Групата, која ја сочинуваат Италија, Австрија, Грција, Чешка, Словачка, Хрватска и Словенија, дискутираше за забрзување на пристапниот процес во актуелниот геополитички контекст. Во дискусиите беше нагласена потребата од храбри и стратешки одлуки за проширувањето на Унијата.
Во своето обраќање, Муцунски ја истакна важноста од отстранување на пречките за непречена трговија со ЕУ.
„Концептот на постепена интеграција треба дополнително да се надгради со нови иницијативи кои ќе овозможат поактивно учество на земјите од регионот во креирањето на политиките на Европската Унија и ќе донесат директни придобивки за граѓаните“, посочи министерот Муцунски.
Посебен акцент беше ставен на Планот за раст и реформската агенда како предуслов за користење на средствата од Унијата. Министерот Муцунски ја потенцираше и важноста на Коридорите VIII и X, кои според него имаат значајна економска и безбедносна важност за цела Европа.