Министерството за внатрешни работи на Хрватска потврди дека земјата нема да бара одложување ниту исклучоци при имплементацијата на новиот систем за влез и излез (Entry/Exit System – EES) на Европската Унија. Иако некои земји-членки изразија загриженост за можни застои, Хрватска уверува дека е технички подготвена за новите правила кои ќе ги заменат досегашните пасошки печати.
Што претставува ЕЕС системот?
Системот ЕЕС е автоматизиран ИТ систем за регистрирање на патници од земји кои не се членки на ЕУ (вклучително и Македонија) при секое преминување на надворешните граници. Наместо рачно удирање печат во пасошот, системот ќе ги регистрира името на патот, видот на патната исправа, биометриските податоци (отпечатоци од прсти и фотографии на лицето), како и датумот и местото на влез и излез.
Без олеснувања за пограничните региони
Од хрватското МВР нагласуваат дека правилата се унифицирани за сите и дека системот мора да се применува доследно.
„Хрватска нема да го укине ниту ќе бара исклучоци за ЕЕС системот на своите граници. Сите патници од трети земји ќе подлежат на истата процедура на граничните премини.“
Целта на новите правила
Главната цел на воведувањето на овој систем е зајакнување на безбедноста на границите, спречување на илегалната миграција и поефикасна идентификација на лицата кои го пречекориле дозволениот престој во Шенген зоната (90 дена во период од 180 дена). Хрватските власти очекуваат дека по првичниот период на прилагодување, системот ќе ја забрза контролата на патниците.