Фондот за здравствено осигурување (ФЗО) ја разгледува можноста за продолжување на породилното отсуство на дванаесет месеци. Според директорот на ФЗО, Сашо Клековски, во тек се анализи кои треба да ги утврдат финансиските импликации и потенцијалните ефекти од ваквата мерка врз системот.
Фокусот на анализите е насочен кон поврзаноста на боледувањата со самиот процес на бременост и мајчинство.
„Се обидуваме низ анализата да видиме колку се тие боледувања пред и после породилното поврзани со истиот процес на бременост. Во зависност од тоа може да видиме како може да го подобриме механизмот, бидејќи ако имаме чести пред и потоа боледувања според мене треба да мислиме на промени во системот на породилните отсуства“, изјави Клековски.
Паралелно со оваа најава, првиот човек на Фондот се осврна и на актуелните поплаки од граѓаните во врска со доцнењето на исплатите за тековните породилни отсуства.
Како главна причина за застојот, Клековски го посочи застарениот начин на работа кој подразбира рачна обработка на податоците.
Тој најави дека е во тек воспоставување на стандардизиран систем со кој во иднина треба да се надминат овие административни пречки и да се обезбеди навремена исплата на средствата до мајките.