Министерот за економија и труд, Бесар Дурмиши, денеска го честиташе Меѓународниот ден на трудот, нагласувајќи дека државата ги засилува контролите на терен за сузбивање на неформалната економија.
Дурмиши истакна дека во изминатиот период, преку социјален дијалог, е постигнато зголемување на платите во неколку клучни сектори.
„Среќен 1 Мај – Меѓународниот ден на трудот. На овој значаен ден, изразуваме длабока почит и благодарност до сите работници, кои со својата посветеност и труд, секојдневно придонесуваат за економскиот и општествениот развој на нашата држава“, напиша министерот на Фејсбук.
Тој појасни дека фокусот на министерството останува на доследното спроведување на законите и заштитата на вработените.
„Во изминатиот период, преку социјален дијалог и колективни договори, постигнавме зголемување на платите во повеќе клучни сектори, со што се подобрува животниот стандард на илјадници работници. Истовремено, ги интензивиравме инспекциските контроли со цел доследно почитување на работничките права и намалување на неформалната економија“, додава Дурмиши.
Министерот потсети и на Оперативниот план за вработување, кој има за цел да создаде нови можности за младите и ранливите категории граѓани.
„Нашата заложба останува цврста да изградиме поправеден, поинклузивен пазар на труд и да обезбедиме достоинствени услови за работа за секој работник“, потенцираше тој.