Министерството за транспорт соопшти дека е завршена евалуацијата за набавка на 150 електрични еколошки автобуси и 75 станици за полнење. Од вкупно четири пристигнати понуди, Комисијата утврди дека три оператори не ги исполнуваат условите, по што е направен прелиминарен избор на најповолен понудувач.
За најповолна е избрана заедничката понуда на унгарската компанија „Електробус-Икарус“ и австриската ЕВН.
„’Електробус – Икарус’ и австриската ЕВН ги исполнија сите услови предвидени во јавната набавка за 150 нови електрични автобуси и 75 станици за полнење и воедно понудија најниска цена од 19 милиони 350 илјади денари или околу 314 илјади евра по автобус што е исклучително конкурентна цена на пазарот на електрични автобуси. Согласно Одлуката, компанијата ‘Икарус’ треба да ги достави електричните автобуси, а компанија ‘ЕВН’ станиците за полнење“, наведуваат од Министерството.
Според техничките карактеристики, автобусите ќе имаат моќност од 300 kW, капацитет за 66 патници и автоматска климатизација. Операторот има обврска да обезбеди одржување и резервни делови во следните 10 години.
Испораката ќе се одвива етапно: првите 30 автобуси и 15 станици треба да пристигнат во рок од шест месеци по потпишување на договорот. Останатите 120 возила ќе бидат испорачани во два наврати во рок од 12, односно 18 месеци.
По донесувањето на оваа одлука, тече рокот за жалба од десет дена.