Основниот суд во Штип денеска му изрече казна доживотен затвор на 74-годишниот штипјанец Денис Асанов, кој беше обвинет за убиство на 79-годишната Борјанка Николова. Пресудата ја објави судијката Јулијана Недкова, откако Асанов беше огласен за виновен за злосторството што ја потресе јавноста минатата година.
Според обвинението, Асанов го извршил грозоморното убиство на монструозен и немилосрден начин. Со остар предмет тој и ги отсекол главата и нозете на оштетената, а трупот со рацете го закопал во дворот од неговата куќа, додека главата и нозете ги фрлил на непознато место.
И покрај обемните претраги спроведени од полицијата и штипското комунално претпријатие „Исар“, вклучително и пребарување на депонијата „Трештена скала“ во Штип, останатите делови од телото не беа пронајдени. Обдукцијата подоцна потврдила дека жртвата имала скршени осум ребра и тешки повреди на градниот кош, најверојатно предизвикани од силен притисок. Телото на Николова беше пронајдено две недели по нејзината смрт.
Во текот на постапката, Асанов првично призна вина пред истражните органи, но подоцна, пред Судот, ја смени изјавата, тврдејќи дека телото го пронашол во куќата.