Македонија денеска се разбуди со значителни температурни разлики, при што на повисоките места сè уште владеат услови блиски до зимските. Утринава најстудено беше на Попова Шапка, каде се измерени -4 степени Целзиусови. Низ останатите делови од земјата температурите се движеа од -1 во Маврови Анови, до 8 степени во Гевгелија.
Изминатите 24 часа беа обележани и со врнежи од дожд, при што најмногу дожд наврна во Битола – 14 литри на метар квадратен, а следуваат Демир Капија со 13 литри, додека Гевгелија и Попова Шапка забележаа 11 литри.
Според прогнозата на Управата за хидрометеоролошки работи (УХМР), денеска во текот на денот ќе преовладува променливо облачно време со сончеви периоди. Во источните делови од државата постојат услови за појава на слаб локален дожд. Метеоролозите најавуваат и умерен, а повремено засилен ветер од северен правец.
Максималните дневни температури ќе се движат во интервал од 12 до 18 степени. Во Скопје времето ќе биде променливо облачно со сончеви интервали и умерен северен ветер, а максималната температура ќе достигне до 18 степени.