Викендот пред нас носи променливо време и пад на стабилноста. Според метеоролозите, сончевите периоди ќе бидат заменети со облачност и локални врнежи од дожд.
Од Управата за хидрометеоролошки работи информираат дека денеска и утре ќе биде карактеристичен северниот ветер.
„Денеска и утре ќе дува умерен со засилен северен ветер и ќе има појава на локален дожд со услови за ретки грмежи“, велат од УХМР.
Во главниот град се очекува слично време. Скопјани треба да подготват чадори поради променливата облачност, иако ветерот во скопската котлина ќе биде со послаб интензитет.
Максималните температури во земјава ќе достигнат до 25 степени, додека во Скопје термометарот ќе се искачи до 24-тиот степен.
Стабилизацијата нема да трае долго, бидејќи нови врнежи се очекуваат веќе од почетокот на наредната недела.
„Од вторник повторно времето ќе биде нестабилно со врнежи од дожд и појава на грмежи“, најавуваат метеоролозите.