Македонското Собрание денеска го утврди дневниот ред на 97. седница, по што започна расправата со поставување прашања од опозициските пратеници до членовите на Владата. На оваа седница, пратениците треба да одлучуваат за клучни кадровски решенија во енергетскиот и финансискиот сектор.
Најзначајната точка е именувањето на нов претседател на Регулаторната комисија за енергетика (РКЕ). Како предлог-кандидат на местото на Марко Бислимоски е Ацо Ристов. Покрај ова, на дневен ред се и предлозите Ана Митреска и Игор Величковски да бидат именувани за вицегувернери на Народната банка.
Собранието прифати неколку законски измени по скратена постапка, поднесени од ВМРО-ДПМНЕ. Меѓу нив е Законот за средното полициско училиште и измените во Законот за финансирање на локалната самоуправа. Со овие измени, општините ќе можат да бараат согласност за ново задолжување доколку доцнат со обврските само 3 месеци, наместо досегашните 12.
На предлог на ЗНАМ, по скратена постапка ќе се носи и Законот за безбедност на сообраќајот на патиштата. Оваа измена ќе им овозможи на возачите со „Б“ категорија, по завршена 4-часовна обука, да управуваат мотоцикли од категоријата А1 со автоматски менувач, исклучиво на територијата на државата.
Парламентарното мнозинство ги одби предлозите на СДСМ за намалување на ДДВ за горивата на 5 проценти и поевтинување на патарините за 50 отсто. Исто така, не беше прифатен предлогот на Левица за измени во Законот за одбраната. Образложувајќи го предлогот, пратеникот Амар Мециновиќ истакна дека се предвидува:
„Армијата да биде ангажирана само во мисии со меѓународен легитимитет, односно кои се одобрени од Советот за безбедност на ООН.“