Центарот за управување со кризи (ЦУК) информира дека во текот на денешниот ден на територијата на државата се регистрирани три активни пожари на отворен простор, од кои најсериозните се веќе ставени под контрола.
Најголемата драма се одвиваше на планината Јабланица, каде поради исклучително тешкиот терен, во гаснењето мораше да се вклучи и воздухопловната поддршка од Армијата. Пожарот таму е целосно локализиран, благодарение на армискиот хеликоптер кој утрово во тричасовна акција извршил 16 прелети и исфрлил 16 ведра вода врз жариштата. Во битката со огнот на земја помагале и струшките пожарникари, како и 12 вработени од ЈП „Национални шуми“ – Јабланица.
Добра вест пристигнува и од битолскиот регион. Пожарот што избувна вчера напладне во дабовата шума на планината Бигла, во непосредна близина на манастирот „Св. Димитрија“ во демирхисарското село Смилево, конечно е локализиран. На терен сè уште дежураат петмина вработени од Подружницата на шумско стопанство „Бигла“ и двајца пожарникари од Демир Хисар.
Во моментов, активна интервенција има само во струмичкиот регион. Екипи на Територијалната противпожарна единица Гевгелија (двојца пожарникари со едно возило) од 11:05 часот гаснат запалена трска во поле во атарот на гевгелиското село Богородица.