Социјалдемократскиот сојуз на Македонија (СДСМ) преку прес-конференција упати недвосмислена поддршка за денешниот протест на работниците и Сојузот на синдикатите. Членката на Извршниот одбор на партијата, Симона Цветановска, во своето обраќање директно им се обрати на работниците, нагласувајќи дека нивното излегување на улица е целосно оправдано.
„Денеска вие со право сте на улиците, се борите за достоинствени плати, за достоинствен живот, за корка леб. Зад секоја плата стои нечиј труд, нечии раце, нечии соништа. Затоа е важно кога работниците ќе застанат заедно и мирно, достоинствено да го побараат она што им припаѓа“, изјави Цветановска.
Таа упати жестоки критики кон Владата и премиерот Христијан Мицкоски, обвинувајќи ги за лицемерен и понижувачки однос кон работничката класа која денеска протестира.
„Христијан Мицкоски ве изневери, ве излажа и ве понижи. Ве нарекува хистерични затоа што барате минимална плата од 600 евра, додека тој носи часовници од 150 минимални плати. Уште вели дека можеле работниците и без одмор, следно ќе каже може и без да јадат“, нагласи претставничката на СДСМ.
Потсетувајќи на економските резултати од времето кога СДСМ ја предводеше државата, Цветановска истакна дека нивната партија и сега цврсто стои на страната на работниците, критикувајќи го неодамнешното отфрлање на нивниот предлог-закон.
„Кога бевме власт платите постојано ги зголемувавме, минималната плата ја зголемивме од 8.000 на над 20.000 денари, а просечната од 22.000 на над 42.000 денари. И сега, кога ви е тешко, СДСМ поднесе Закон за минимална плата од 600 евра, но Владата го одби барањето“, додаде таа.
На крајот од прес-конференцијата, од партијата порачаа дека немаат намера да го политизираат работничкото незадоволство, но ги повикаа сите свои членови да дадат масовна поддршка на денешниот марш низ скопските улици.
„Протестот на Синдикатот не е политика – тоа е борба за достоинство, за праведна плата и за подобар живот за секое семејство. Ние нема да го злоупотребуваме вашиот протест ниту ќе го политизираме, ние не сме ВМРО. Сите членови на СДСМ кои се и членови на Синдикатот ги повикуваме да се приклучат. Ова е ваша борба. Гласот на работниците мора да се слушне“, заклучи Цветановска.