Градоначалникот на Град Скопје, Орце Ѓорѓиевски и градоначалникот на Општина Бутел, Дарко Костовски, денеска го означија почетокот на проектот за темелно чистење на коритото на реката Серава и изградба на модерна пешачка патека. Овој зафат, кој жителите на овој дел од Скопје го чекаа две децении, има за цел целосно да го трансформира запуштениот простор.
Според проектот, новата пешачка патека ќе биде со должина од близу 1,6 километри, нудејќи им на граѓаните нова зона за рекреација и прошетки.
Покрај чистењето на коритото, предвидено е поставување на современа урбана опрема и содржини за најмладите.
„Новата пешачка патека ќе се протега во должина од 1590 метри, создавајќи уредена и безбедна зона за прошетка, рекреација и дружење. Долж неа ќе биде поставено современо лед осветлување, нови клупи и урбана опрема, а целиот простор ќе биде дополнително разубавен со ново зеленило. Во рамки на овој проект ќе се изградат и нови детски игралишта“, изјави Ѓорѓиевски.