Околу 20 милиони евра финансиска поддршка веќе се исплатени кон земјоделците од моментот на усвојување на Програма за финансиска поддршка во земјоделството 2026, информира министерот за земјоделство, шумарство и водостопанство, Цветан Трипуновски, во гостување во емисијата „Топ тема“.
Трипуновски посочи дека Министерството во изминатиот период одржало серија состаноци со речиси сите релевантни земјоделски здруженија, со цел заедничко креирање на мерките во годинешната програма.
„Првиот состанок беше одржан пред донесувањето на Програмата, кога ги слушнавме предлозите, идеите и сугестиите од здруженијата. Целта беше мерките да се креираат заеднички и да одговорат на реалните потреби на производителите“, истакна министерот.
Тој нагласи дека во рамките на институцијата функционираат потсекторски групи за секој вид производство, во кои членуваат претставници од земјоделските здруженија, научната заедница, бизнис-секторот и администрацијата.
По стапувањето во сила на Програмата, биле одржани дополнителни состаноци на кои биле презентирани новините и измените во мерките. Трипуновски потенцира дека Министерството останува отворено за сите земјоделци и нивни претставници, со цел мерките да продолжат да одговараат на реалните потреби на производителите.