Хартиените здравствени книшки и купиштата документација наскоро заминуваат во историјата. Министерот за здравство, Азир Алиу, денеска ги презентираше измените на Законот за евиденциите во здравството, со кои се предвидува целосна дигитализација на системот. Електронското здравствено досие станува централен извор на податоци за секој пациент.
Според Алиу, граѓаните ќе имаат директен пристап до своите прегледи, резултати и рецепти преку мобилна апликација или веб-портал.
„Нашата цел е здравствените податоци да се водат модерно, безбедно и поврзано. Хартиената документација ќе се користи само во исклучителни ситуации, при прекин на системот. Телемедицинските услуги исто така добиваат еднаква правна важност како и физичките прегледи“, истакна министерот Алиу.
Новите законски измени веќе се поставуваат на ЕНЕР, а со нив се обврзуваат и јавните и приватните установи да ги усогласат своите системи со националниот систем „Мој Термин“.