Пратеникот од редовите на ВМРО-ДПМНЕ, Миле Лефков, денеска упати жестоки критики до поранешното раководство на СДСМ, обвинувајќи ги Зоран Заев и Венко Филипче дека со своите политики ја оддалечиле државата од демократските стандарди. Според него, претходната власт создала „хибриден режим“ со карактеристики слични на оние во Русија и Белорусија.
Лефков како клучни примери ги наведе контроверзните ликови Онишченко и Борче Марковски, за кои тврди дека биле блиски соработници на Путин и Лукашенко, а на кои СДСМ им овозможила влез во земјата.
„Онишченко и Борче Марковски, кои се блиски соработници до Путин и Лукашенко, се лица кои власта на СДС, Заев и Филипче им ја отвори вратата да дојдат, да се вдомат и да водат бизниси. По некое време, едниот е осуден на 15 години затвор, другиот седи на обвинителна клупа. Само вакви криминални ликови успеваа во времето на СДС“, изјави Лефков.
Тој потенцираше дека ВМРО-ДПМНЕ води дијаметрално спротивна политика заснована на договори со ЕУ, САД и Велика Британија, како единствен начин за зачувување на државното достоинство.