Дипломатските односи меѓу САД и Шпанија достигнаа точка на вриење откако шпанскиот премиер Педро Санчез го одби барањето на Вашингтон за користење на воените бази за операции против Иран. Како одговор на ова, американскиот претседател Доналд Трамп упати директна закана за целосен прекин на трговската размена меѓу двете земји.
И покрај притисокот, Санчез денеска ја потврди цврстата позиција на својата влада:
„Ставот на шпанската Влада е јасен – ’Не за војната‘. Шпанија нема да учествува во воени дејствија, ниту ќе ја поддржи ескалацијата на конфликтот.“
Од друга страна, за време на заедничката прес-конференција со германскиот канцелар Фридрих Мерц, Трамп не го криеше своето незадоволство од одлуката на Мадрид:
„Шпанија беше ужасна. Му реков на Скот Бесант да ги прекине сите деловни односи со Шпанија. Не сакаме да имаме никаква врска со нив.“
Трамп дури сугерираше дека САД би можеле еднострано да ги користат базите на шпанска територија, без оглед на противењето на локалните власти. Весникот „Ел Паис“ извести дека Санчез свесно ја донел оваа одлука, прифаќајќи ги политичките и економските ризици со цел да се заложи за деескалација и преговори.
Додека остатокот од Европа покажува воздржаност или делумна поддршка за американско-израелските акции, Шпанија останува меѓу ретките западни земји кои отворено ги осудија нападите, предупредувајќи на катастрофални последици по европската безбедност.