Македонска собраниска делегација ќе учествува на Интерпарламентарната конференција за заедничката надворешна и безбедносна политика (CFSP) и заедничката безбедносна и одбранбена политика (CSDP), која од 3 до 5 март ќе се одржи во Никозија, Кипар. Конференцијата, организирана од Парламентот на Република Кипар во рамките на парламентарната димензија на Кипарското претседателство на Советот на ЕУ, има за цел да ја зајакне отпорноста, единството и ефикасноста на ЕУ во областа на надворешната и безбедносната политика, во услови на актуелни геополитички предизвици.
Фокусот ќе биде ставен на приоритетите и стратегиите на CFSP и CSDP, улогата на ЕУ во Северна Африка и Блискиот Исток, како и развојот на посилна и покапацитетна европска одбрана.
Во состав на македонската делегација се претседателот на Комисијата за одбрана и безбедност, Павле Арсоски, претседателот на Комисијата за надворешна политика и надворешна трговија, Муса Џафери, како и членовите на овие комисии – Оливер Спасовски и Рашела Мизрахи.
На конференцијата ќе учествуваат претседатели на надлежни парламентарни комисии од земјите членки на ЕУ и Западен Балкан, членови на Европскиот парламент, како и претставници од академската и безбедносната заедница. Оваа платформа е значајна за размена на мислења и зајакнување на интерпарламентарната соработка меѓу националните парламенти, Европскиот парламент и поканетите експерти.