Министерството за образование и наука (МОН) ги информира студентите дека од денеска започнува нов рок за пријавување за правото на субвенциониран студентски оброк за академската 2025/2026 година. Аплицирањето ќе трае до 5 март 2026 година.
Правото на овој државен додаток можат да го остварат сите редовни студенти на додипломски, постдипломски и интегрирани студии на државните и приватните универзитети, под услов нивниот месечен приход да е помал од минималната нето плата во државата.
„Студентите што ги исполнуваат условите, а не аплицирале досега, може да поднесат апликација електронски преку порталот: e-uslugi.mon.gov.mk“, соопштуваат од МОН.
Овој рок е отворен и за оние на кои претходно им било прекинато правото, но сметаат дека сега повторно ги исполнуваат условите за користење на средствата за оброк.