Апелациониот суд Скопје денеска ја одби како неоснована жалбата на Истражувачката репортерска лабораторија (ИРЛ) и на уредничката Сашка Цветковска и со тоа ја потврди првостепената пресуда во спорот што го поведе бизнисменот Кочо Анѓушев поради наводи изнесени во документарецот „Заговор против воздухот“, емитуван во 2021 година на МРТ.
Одлуката, како што објави „360 степени“, била соопштена кусо, без усно образложение, при што е наведено дека деталите ќе следуваат во писмената пресуда, а за трошоците судот дополнително ќе се произнесе во писмената изрека.
Од компанијата Фероинвест велат дека со оваа пресуда се потврдило дека пишувањата на медиумот кои го поврзуваат Анѓушев со набавката на токсичен мазут биле клеветнички и не ги испочитувале мјинималните новинарски стандарди за обезбедување став од засегнатата страна.
,,Судовите со овие пресуди потврдија дека оваа група со години врши медиумски клевети, изнесува лаги и зависно од текот на финансиите креира средина во Македонија за јавна пресметка со одредени личности за да направи дефокус и заштита токму на вистинските сторители на казниви дела, и користена е за внатрешни политички пресметки во Македонија служејќи на одредени страни.
Во секоја земја економијата е таа која ја движи државата напред и која продуцира работни места и ја полни државната каса со даноци, за да има функционално општество.
Кај нас, зад нападите врз компаниите и бизнисмените со лажни вести стојат крајно неодговорни лица кои се водат само од свои кариерни и хонорарни причини, а нанесуваат економска штета на самата држава и на стопанството.”, велат од Фероинвест по денешното изрекување на пресудата на Апелациониот суд.
Од страна на ИРЛ, според „360 степени“, засега нема конечна одлука за следните чекори, но правниот тим најавил дека е можен поднесок до Уставниот суд, со аргументација поврзана со правото на слободно изразување. Во судницата, Цветковска одлуката ја искоментирала кратко и иронично со зборовите „Секоја чест“, додавајќи дека очекуваат писмено образложение.
Реакција испратија новинарските организации ЗНМ и ССНМ. Во заедничко соопштение тие изразуваат загриженост дека вакви одлуки создаваат притисок врз независното истражувачко новинарство и предупредуваат на, како што велат, опасен преседан институциите да одредуваат што е медиум и кој е новинар.
„Укажуваме дека ЗНМ во период подолг од пет години обезбедуваше бесплатна правна поддршка, а двете организации јавно го следеа овој предмет и посочуваа на неговото значење за слободата на изразување, јавниот интерес и заштитата на истражувачкото новинарство, вклучително и во контекст на ризиците од стратешки тужби против јавно учество (СЛАПП)“, велат од организациите.
Инаку во јуни 2021г, 3 недели по објавата на филмот на ИРЛ кој потоа беше предмет на тужба за клевета
Регулаторната комисија за енергетика ги провери сите 19 фирми кои имаа лиценца за трговија со нафта и нафтени деривати, вклучително и со мазут, и утврди неправилности кај 7 од нив.
Државните органи во 2025г поднесоа кривична пријава за фирмата РКМ и нејзиниот сопственик Ратко Капушевски заедно со уште 12 други лица токму за финансиски малверзации и увоз на токсичен мазут со години наназад. Ниту во првиот ниту во вториот случај не беше откриена и посочена поврзаност на спорните активности со мазут со Анѓушев или некоја од неговите компании.