Германското Министерство за надворешни работи упати апел до своите граѓани на Блискиот Исток итно да преземат мерки на претпазливост поради зголемениот ризик од американски воени напади врз Иран. Според германската амбасада во Тел Авив, постои реална опасност од ирански одговор кој директно би го погодил Израел и другите земји во регионот.
На Германците кои се наоѓаат во Израел им е препорачано да се подготват за подолг престој на затворено, во случај на ненадејно затворање на воздушниот простор.
„На германските граѓани им се советува да инсталираат апликации за предупредување од ракетни напади, да направат резерви на храна и намирници со оглед на ескалирачката безбедносна ситуација и детално да се запознаат со локациите на најблиските засолништа“, стои во соопштението пренесено од ДПА.
Освен за Израел, Берлин предупредува и на драстично влошување на состојбата во Либан, каде се очекуваат нови ограничувања на летовите. Германските власти стравуваат дека групата „Хезболах“, како главен сојузник на Техеран, би можела дополнително да го интензивира конфликтот доколку САД извршат напад врз иранска територија.