Министерот за животна средина и просторно планирање, Муамет Хоџа, денес оствари работна средба со амбасадорот на Република Турција во Република Северна Македонија, Фатих Улусој, на која беа разгледани можностите за унапредување и продлабочување на билатералната соработка, со посебен фокус на областа на животната средина.
На средбата, министерот Хоџа изрази искрена благодарност за долгогодишната и континуирана поддршка што Република Турција ѝ ја дава на Република Северна Македонија уште од нејзиното осамостојување, потенцирајќи ја важноста на партнерството меѓу двете земји во реализацијата на заеднички иницијативи и проекти.
Соговорниците разговараа и за претстојниот Форум за води, кој ќе се одржи на 5 и 6 мај годинава во Истанбул, со учество на министрите за животна средина од земјите на Западен Балкан, како и за одржувањето на 31-вата Конференција на страните (COP31), најзначајниот глобален самит за климатски промени под покровителство на Обединетите нации, кој ќе се одржи во Анталија, Република Турција.
На крајот од средбата, министерот Хоџа изрази уверување дека билатералната соработка меѓу Северна Македонија и Турција ќе продолжи да се развива, придонесувајќи кон зајакнување на меѓусебните односи и интензивирање на размената на знаења и искуства од заеднички интерес.