Во обраќањето на Светскиот економски форум во Давос, американскиот претседател Доналд Трамп упати остра критика кон Европа, ги пофали економските резултати на Соединетите Американски Држави и повторно ја актуелизираше контроверзната идеја за набавка на Гренланд.
„Нема да употребам сила, но го сакам Гренланд итно. Преговорите мора да започнат веднаш, сакам таму да изградам Златна купола!“, изјави Трамп, алудирајќи на неговата визија за стратешко присуство на островот.
Тој се осврна и на говорот на канадскиот премиер, кој предизвика бројни реакции во Давос, испраќајќи му директна порака: „Канада постои благодарејќи на нас. Знај го тоа следниот пат кога ќе даваш изјави“.
Трамп ја оправда идејата за купување територии со историски аргументи, нагласувајќи дека тоа не е преседан. „Во историјата сме купиле бројни земји… Нема ништо лошо во тоа“, рече тој.
Британскиот весник Телеграф забележа дека во последните денови Трамп неколкупати го мешал Гренланд со Исланд, што предизвика дополнителни реакции во јавноста.
Во продолжение на говорот, американскиот претседател упати критики и кон Европската унија. „Ја сакам Европа и сакам да оди во добар правец, ама, не оди. Не можам да ја препознам Европа, во негативна смисла“, изјави Трамп.
Посебно остар беше кон Данска, потсетувајќи на Втората светска војна. Според него, земјата брзо паднала под окупација и била спасена од САД, заедно со Гренланд. „Без нас денес ќе зборувавте германски и по малку јапонски“, рече Трамп, додавајќи дека Данска покажува неблагодарност за американската помош.