Електронските цигари и загреаните тутунски производи со вкус на јагода, ванила, ментол или други билки наскоро ќе бидат минато. Новиот предлог-закон за заштита од пушењето предвидува забрана за нивно производство, увоз и продажба, бидејќи се сметаат за „мамка“ за младите.
Надлежните алармираат дека овие производи создаваат штетни аеросоли и лесно предизвикуваат зависност. Министерот Азир Алиу откри дека речиси секој десетти ученик на возраст од 13 до 15 години веќе користи електронска цигара, а над 10% изјавиле дека пробале загреани тутунски производи.
Со новиот закон, државата ги изедначува сите алтернативни никотински уреди со класичните цигари и воведува строги ограничувања за нивна промоција и достапност, следејќи ги насоките на СЗО.