СДСМ со сериозни обвинувања кон Владата тврдејќи дека најновите одлуки за либерализација на пазарот на труд се всушност параван за реализација на таен договор за прифаќање мигранти.
Според СДСМ, одлуката за увоз на работна сила е апсурд во услови на висока домашна невработеност.
„Пред неколку дена, со одлука на Владата на Мицкоски, отворена е вратата за влез на 10.000 т.н. економски работници иако во Македонија има речиси 100.000 невработени. Пред ова Владата на Мицкоски го смени и Законот за странците за да го олесни доаѓањето“, се наведува во партиското соопштение.
Од опозицијата директно ја поврзуваат оваа мерка со претходните извештаи во странските медиуми. Тие сметаат дека терминологијата намерно се менува од „мигранти“ во „економски работници“.
„Ова се поклопува во целост со пишувањето на британските медиуми за ’стратешки договор‘ во согласност со кој мигрантите би добиле работни визи во Македонија за работа во разни сектори. Драги граѓани на Македонија, дали сега ви е јасно дека договор мигранти за пари има? Еве преку оваа објава тие тоа и го потврдија“, истакнуваат од СДСМ.
Партијата остро реагираше и на шпекулациите околу нивната онлајн-петиција, негирајќи дека таа била прекината поради слаб интерес од граѓаните. Наместо тоа, СДСМ употреби исклучително остра реторика, споредувајќи ги потезите на власта со фашистички режими.
„Сега кујните на ВМРО објавуваат вести дека граѓаните не ја поддржале онлајн-петицијата на СДСМ, што СДСМ ја прекина само по неколку дена затоа што ВМРО изгласа декрет како од Третиот Рајх, за забрана на слободата на говор“, велат од СДСМ.
Тие додаваат дека власта сега манипулира со оваа ситуација.
„Но, сега што прави ВМРО со ова? Го користат за да наметнат мислење дека, всушност, граѓаните не ја поддржале петицијата затоа што поддржуваат доаѓање мигранти, односно т.н. економски работници, како што ја сменија терминологијата.“
На крајот, СДСМ заклучува дека единствениот мотив за ваквите потези е очајната финансиска состојба на државната каса.
„Пари нема во буџетот, веќе сега недостигаат две милијарди евра на тендер-коалицијата, ВМРО – ЗНАМ им фрлаат пари за нови тендери“, стои во реакцијата на опозициската партија.