Дваесет и четири годишниот Петар Чакарески е најсреќниот меѓу стотиците верници кои денеска скокнаа во студените води на реката Црн Дрим во Струга. Чакарески, кој традиционално се капе на овој празник, за првпат успеа да стигне до светиот крст.
На свеченоста присуствуваше претседателката Гордана Сиљановска-Давкова, која не го криеше воодушевувањето од атмосферата. „Осветувањето на водите на Дрим е прекрасно, како да сте покрај Јордан. Ова е моментот кога Бог се јавил и тоа нè прави посилни и подобри луѓе“, изјави претседателката.
Чинот на осветување го изврши новиот митрополит г. Георгиј, а настанот беше проследен од државниот врв, локалната самоуправа предводена од градоначалникот Менди Ќура и илјадници граѓани.