Претседателката на државата, Гордана Сиљановска-Давкова, упати честитка до граѓаните кои го прославуваат денот на Христовото раѓање – Божиќ.
Во својата порака, претседателката посака празничниот мир да влезе во секој дом.
Претседателката истакна дека Божиќ, како ден на раѓањето на Спасителот, служи како инспирација за добрина и меѓусебна помош.
„Од срце посакувам мирот божји да го завладее секој православен дом, исполнувајќи го со божјите добродетели. Рождеството Христово нè вдахновува со неизмерна љубов, потсетувајќи нè на давањето безусловена помош и утеха на сите на кои им се потребни“, вели Сиљановска-Давкова.
И годинава, вели претседателката, божиќните празници ќе ја зацврстат нашата вера и надеж и ќе нè потсетат на човековата насушна потреба од чинењето добри дела.
„Да му се радуваме на животот и да придонесуваме за доброто на заедницата. Да ги отвориме ширум нашите срца за сите ближни, та, така сплотени во соборноста, да ја креираме и градиме благосостојбата на македонското општество“, вели Сиљановска-Давкова.
Покрај до граѓаните, претседателката упати честитки и до архиепископот охридски и македонски и на Јустинијана Прима, г.г. Стефан, како и до претседателот на Црковното претставништво на Евангелско – методистичката црква, Емил Заев.
Честитката завршува со традиционалниот христијански поздрав „Христос се роди!“
Претседателката денеска традиционално, во претпладневните часови, беше посетена од групи деца и млади од бадниковите поворки. Таа во духот на празникот ги дарувала со бадникови пакетчиња.