Швајцарските власти ја завршија идентификацијата на сите 40 жртви кои настрадаа во катастрофалниот пожар во барот „Констеласион“ на новогодишната ноќ. Како што соопшти полицијата на кантонот Вале, меѓу загинатите има 20 малолетници.
Според официјалните податоци, меѓу жртвите има 21 државјанин на Швајцарија и 19 странци на возраст од 14 до 39 години. Меѓу нив е потврден и еден Србин со двојно државјанство.
„Меѓу странците има осум Французи, меѓу кои и 15-годишно девојче со француско-израелско-британско државјанство, шест Италијанци, една Белгијка, една Португалка, еден Романец, еден Турчин и еден Србин со двојно швајцарско-српско државјанство“, пренесува швајцарскиот весник „Темп“.
Во моментот остануваат да се идентификуваат уште шест лица меѓу 119-те повредени. Поради сериозноста на состојбата, 35 пациенти со тешки изгореници се префрлени на лекување во специјализирани болници во Франција, Белгија, Германија и Италија.