Основното јавно обвинителство Скопје го расчисти убиството што се случи на новогодишната ноќ во Старата скопска чаршија. Осомничениот, 25-годишен турски државјанин со престој во Тетово, е лишен од слобода во Косово.
Според истрагата, инцидентот почнал со банална расправија во кафе-бар меѓу осомничениот и двајца други турски државјани (на возраст од 22 и 23 години). Оштетените заминале кон плоштадот, но бидејќи не успеале да најдат такси, се вратиле назад кон Чаршијата. При повторната средба пред истиот локал, расправијата ескалирала.
Осомничениот извадил нож и му нанел четири убоди во градниот кош и срцето на оштетениот Ахмет Мерт Доган, кој починал на лице место. Со убодна рана во грбот се здобил и неговиот пријател, кој за среќа преживеал.
Убиецот веднаш побегнал, но бил идентификуван преку снимки од видео надзор. По распишаната потрага, тој е уапсен од косовските власти. ОЈО Скопје веќе побара притвор во отсуство за да се започне итна постапка за негова екстрадиција во Македонија.