Русија тврди дека Украина извршила напад со беспилотни летала врз една од официјалните резиденции на претседателот Владимир Путин, додека Кина повика на воздржаност и избегнување понатамошна ескалација на конфликтот.
Според Скај њуз, кинеското Министерство за надворешни работи соопшти дека конфликтот не смее да „се прелее надвор од бојното поле“, нагласувајќи дека не треба да има ескалација, и покрај најавите на Москва дека ќе одговори на наводниот напад.
Претходно, рускиот министер за надворешни работи Сергеј Лавров изјави дека за време на наводниот напад биле уништени 91 украински дрон и дека „целите и времето на руската одмазда веќе се утврдени“.
Украинскиот претседател Володимир Зеленски ги негираше обвинувањата, нарекувајќи ги „лаги“. Во меѓувреме, според медиумските извештаи, жители во близина на резиденцијата изјавиле дека не забележале дронови во областа.
Денеска се огласи и портпаролот на Кремљ, Дмитриј Песков, кој изјави дека нема потреба да се презентираат докази за нападот. „Не мислам дека треба да има никакви докази“, рече Песков, додавајќи дека негирањето на нападот е „апсурдно“.
Тој нагласи дека Москва ги смета наводните воздушни напади за „терористички напад“, чија цел, според него, е да се спречат мировните преговори.
„Нападот не бил насочен само против претседателот на Русија, туку и против претседателот на Соединетите Американски Држави, Доналд Трамп. Целта била да се нарушат неговите напори за постигнување мирно решение на украинскиот конфликт“, изјави Песков.
Тој повтори дека Кремљ не смета дека се потребни дополнителни докази за, како што рече, масовниот напад со беспилотни летала, кој бил успешно одбиен од руската воздушна одбрана.
„Што се однесува до остатоците од беспилотните летала, не можам да коментирам. Тоа е во надлежност на нашата армија“, заклучи Песков.