Американскиот претседател Доналд Трамп во својата божиќна честитка упати остри критики кон поединци во Соединетите Американски Држави кои, како што наведе, биле блиски со финансиерот и осуден сексуален престапник Џефри Епстин, а подоцна јавно се дистанцирале од него.
Во објава на социјалната мрежа Truth Social, Трамп обвини дека многу влијателни луѓе го поддржувале Епстин, а потоа, по поднесувањето обвиненија против него, лажно тврделе дека немале никаква поврзаност.
– Среќен Божиќ на сите, вклучително и на многуте гадови кои го сакаа Џефри Епстин, му даваа купишта пари, одеа на неговиот остров, присуствуваа на неговите забави и мислеа дека е најдобриот човек на светот, само за да го ’шутнат како куче‘ кога работите станаа премногу жешки, лажно тврдејќи дека немаат никаква врска со него, дека не го познаваат, велејќи дека е одвратна личност, а потоа обвинувајќи го, секако, претседателот Доналд Џ. Трамп, кој всушност беше единствениот кој се дистанцираше од Епстин, и тоа многу пред тоа да стане модерно, напиша Трамп.
Тој додаде дека, според него, ќе следуваат бројни објаснувања кога ќе се обелоденат имињата на сите лица поврзани со Епстин, во, како што го нарече, „тековниот лов на вештерки од страна на радикалната левица“.
Трамп направи паралела со претходните обвинувања за наводно руско мешање во изборите, кои ги оцени како целосно измислени.
– Неуспешниот „Њујорк тајмс“, меѓу многуте други, беше принуден да се извини поради своето лошо и погрешно известување за изборите … Сега истите губитници се повторно тука, само што овојпат толку многу нивни пријатели, главно невини, ќе бидат тешко повредени и ќе им биде нарушен угледот. Но, за жал, таков е светот на корумпираната демократска политика! Уживајте во она што би можело да биде ваш последен среќен Божиќ, додаде Трамп.
Во меѓувреме, американското Министерство за правда соопшти дека Сојузното обвинителство за јужниот округ на Њујорк и ФБИ пронашле повеќе од еден милион дополнителни документи кои потенцијално се поврзани со случајот Епстин. Поради обемот на материјалот, процесот на нивно објавување би можел да потрае уште неколку недели.
Како што е наведено, документите вклучуваат видео-записи, аудио-снимки и фотографии на кои, покрај Епстин, се појавуваат и бројни влијателни личности од политичкиот и деловниот свет.