Зимата што претстои ќе биде за околу еден степен потопла од повеќегодишниот просек, но со повремени студени бранови, покажуваат најновите климатски очекувања. Според анализата на професорите Владо Спиридонов и Ивица Милевски, не се очекуваат долготрајни екстремни студови, туку претежно променливо и умерено топло време.
Студени периоди со температури под нормалата се очекуваат од крајот на декември до средината на јануари, како и кон крајот на февруари. Во Скопје и Штип средните температури ќе се движат од 1 до 4 степени, додека на планините од 0 до -3 степени.
„Бројот на мразни денови ќе изнесува 30–55 во низините и 60–75 на планините, додека ледените денови ќе бидат релативно ретки во низините (5–15), но почести на планините (25–40). Студени бранови со температури околу или под нормалните се најверојатни кон крајот на декември до средината на јануари, како и кон крајот на февруари, но без сигнали за долготрајни или екстремни зимски студови“, пишува во анализата.
Професорите предупредуваат дека во стабилните периоди со антициклони, во котлините ќе има појава на магла и температурни инверзии. Ова ќе доведе до значително влошување на квалитетот на воздухот, особено во Скопската, Полошката и Струмичката котлина.
„Во целина, зимата 2025–2026 ќе биде потопла од просекот, динамична и со изразени краткотрајни зимски настани, при што главните ризици произлегуваат од временската променливост, кратките интензивни врнежни епизоди, снежните бури во планините и епизодите со многу лош квалитет на воздухот во котлините“, оценуваат Спиридонов и Милевски.