Иако со месеци се зборува за регулација и евиденција на влијателните личности на социјалните мрежи, резултатите на терен се поразителни. Во Регистарот на физички лица кои даваат аудиовизуелни медиумски услуги по барање, што го воспостави Агенцијата за аудио и аудиовизуелни медиумски услуги (АВМУ), досега е регистрирано само едно лице.
Ова беше соопштено на денешниот четврти јавен состанок на Агенцијата, каде директорот Зоран Трајчевски ги презентираше активностите за последниот квартал од 2025 година.
Под поимот даватели на АВМУ услуги по барање спаѓаат инфлуенсерите, влогерите и креаторите на содржини кои остваруваат економска корист од своите објави. За да се олесни процесот и да се појаснат обврските, Агенцијата веќе има изготвено и „Нацрт-Водич за инфлуенсер(к)и и влогер(к)и“, но се чини дека тоа не било доволно за да се мотивира оваа растечка заедница да влезе во легалните текови на медиумската евиденција.
Ксенија Николовска е инфлуенсерката која се пријавила во регистарот кој го води АВМУ. Таа пријавила дека е достапна на Инстаграм и Фејсбук, а се регистрирала на 01.12.2025 година.