Трошоците за живот во Македонија продолжуваат да растат, потврдија најновите пресметки на Сојузот на синдикати на Македонија (ССМ). Вредноста на синдикалната минимална кошница за декември годинава достигна 65.492 денари, што претставува зголемување од 319 денари во споредба со ноември, кога истата изнесуваше 65.173 денари. Доколку семејството нема сопствен дом и плаќа кирија за стан од 60 метри квадратни, тогаш сумата потребна за да се преживее месецот се искачува на високи 80.867 денари.
Анализата на структурата на трошоците покажува дека најголем дел од домашниот буџет сè уште оди за исхрана. Според ССМ, само за храна и пијалаци во декември се потребни 23.640 денари. За образование се издвојуваат 7.159 денари, додека комуналиите, вклучувајќи станарина, вода, струја и греење, чинат 6.130 денари. За облека и обувки семејството треба да обезбеди 5.875 денари, за транспорт 4.636 денари, а за лична и домашна хигиена 2.620 денари. Останатите средства се распоредени за ресторани, хотели и комуникации.
Во меѓувреме, Владата најавува нов начин на пресметка на трошоците од почетокот на наредната година. Заменик министерот за економија и труд, Марјан Ристески, информираше дека од 1 јануари, паралелно со синдикатите, и Владата ќе изготвува своја пресметка за „просечна потрошувачка кошница“ за четиричлено семејство. Оваа методологија и деталите околу неа ќе бидат тема на разговор на претстојната седница на Економско-социјалниот совет закажана за понеделник, 22 декември.