Ахмед ал Ахмед, минувачот кој вчера херојски успеа да го совлада и разоружа еден од напаѓачите за време на терористичкиот напад во Бонди, изјави дека, и покрај тешките повреди и силната болка, „повторно би го направил истото“. Ова го потврди неговиот адвокат за миграции, Сем Иса, нагласувајќи дека Ахмед не жали за својот чин.
Ахмед е хоспитализиран во болницата „Сент Џорџ“ во Когара каде закрепнува по првата операција. Тој има пет прострелни рани на левата рака, а еден куршум сѐ уште е заглавен во пределот на левата лопатка.
Лекарите се загрижени поради сериозната загуба на крв и постои ризик дека тој би можел да ја изгуби раката.
Неговиот адвокат истакна дека Ахмед е скромен човек кој не бара медиумско внимание и постапил од чисто чувство на човечка и морална должност. По добивањето на австралиско државјанство во 2022 година, тој се чувствувал обврзан да ѝ помогне на заедницата која го прифатила.
Неговите родители, пак, изјавија дека и покрај повредите, тој е добро расположен. Мајката призна дека „плачела од гордост“ кога дознала дека синот спасил животи, а таткото додаде дека Ахмед му се заблагодарил на Бога што им помогнал на невини луѓе.
За поддршка на неговото лекување и опоравување, преку GoFundMe кампања се собрани над половина милион долари.
Херојството на Ахмед го пофалија австралискиот премиер Ентони Албаниз и премиерот на Нов Јужен Велс, Крис Минс, а поддршка упати и американскиот претседател Доналд Трамп.
Ахмед ал Ахмед (44), со сириско потекло, живее во Австралија од 2006 година, сопственик е на мал бизнис и татко на две мали ќерки.