Стефан Андоновски, во подкастот „Претрес кај Ландов“, изнел тврдење дека лидерот на опозицијата Венко Филипче, како член на тогашната влада, во 2018 година гласал за одлука со која се предвидувала изградба на камп – прифатен центар за странци во скопската населба Бардовци. Тврдењето е пренесено во соопштение на ВМРО-ДПМНЕ
Според Андоновски, одлуката на Владата од 23 јануари 2018 година, објавена во „Службен весник“, предвидувала изградба на прифатен центар за потребите на Секторот за гранични работи и миграција при МВР. Тој оцени дека е „апсурд и класична манипулација“ опозицискиот лидер денес да обвинува за наводни мигрантски договори, додека, како што тврди, во минатото поддржал ваков проект.
Андоновски потсети и на протестите што тогаш се одржале во делот помеѓу Бардовци и Чучер-Сандево, на кои жителите се спротивставиле на изградбата на центарот.
„Апсурдно е да се зборува дека ВМРО-ДПМНЕ градело или прифаќало мигранти, без ниту еден доказ дека владата предводена од партијата преговарала на оваа тема. ВМРО-ДПМНЕ беше владата која го менаџираше најголемиот бран на мигранти и ја бранеше Европа од Европа“, изјави Андоновски.
Тој додаде дека „човекот кој деновиве држи прес-конференции за мигранти, во 2018 година гласал за изградба на мигрантски камп во Македонија, конкретно во Бардовци“.