Пробното пуштање на системот „Сејф сити“ за само три дена регистрирало огромен број сообраќајни прекршоци, што според Министерството за внатрешни работи (МВР) го потврдува неговото значење за подобрување на безбедноста на патиштата.
Началничката на Секторот за сообраќајни работи во МВР, Маја Арсовска Манов, и државниот советник, Владимир Велковски, во гостување на ТВ Телма открија дека системот забележал и „рекордер“ во брзо возење: возило се движело со дури 231 километар на час на скопската обиколница, на 1 декември.
Во првите 24 часа од тест-периодот, на 1 декември, системот регистрирал околу 110.000 прекршоци. Следниот ден, на 2 декември, бројката значително се намалила на 50.652 евидентирани прекршоци.
Од прекршоците регистрирани на 2 декември, најголем дел, односно 48.861 случаи, се однесувале на пречекорување на брзината. За поминување на црвено светло биле регистрирани 1.366 прекршоци, а 425 за нерегистрирани возила.
Најголема концентрација на брзо возење е забележана на излезот од Скопје кон Тетово, каде имало околу 4.300 прекршоци, како и на булевар „Никола Карев“, со евидентирани околу 3.000 случаи.
Соговорниците од МВР нагласија дека податоците добиени за само неколку дена од тестирањето ја потврдуваат потребата од целосно воведување на системот „Сејф сити“, со цел значително унапредување на безбедноста во сообраќајот.