Американскиот мировен предлог за завршување на војната во Украина е скратен од првичните 28 на 19 точки, објави Фајненшл тајмс, повикувајќи се на извори запознаени со процесот. Изворите не откриле кои делови од планот се исфрлени.
По вчерашната средба меѓу американската и украинската делегација во Женева, двете страни соопштија дека е постигнат напредок во обидите да се приближат ставовите меѓу Киев и Москва, но не соопштија конкретни детали за решавање на клучните несогласувања.
Американскиот државен секретар Марко Рубио, по еднодневните разговори со украинските и европските претставници, изјави дека е постигнат „огромен напредок“. За процесот се огласи и американскиот претседател Доналд Трамп, кој денеска даде краток коментар за преговорите.
„Дали е навистина можно да се постигне голем напредок во мировните преговори меѓу Русија и Украина??? Не верувајте додека не го видите, но можеби се случува нешто добро“, напиша тој на својата социјална мрежа Truth Social.
Дел од европските лидери претходно изразија загриженост за поединечни сегменти од планот, особено во делот што се однесува на санкциите кон Москва и замрзнатите руски суверени средства — прашања за кои, како што нагласуваат, одлуката треба да биде на ЕУ.
Лидерите на ЕУ денеска расправаа за исходот од женевската средба и за можните следни чекори, потврдија официјални претставници вклучени во подготовките.
Како што изјави Рубио, конечниот текст на договорот ќе треба да биде одобрен од украинскиот претседател Володимир Зеленски и американскиот претседател Доналд Трамп, пред документот да биде доставен до Москва.