Четири лица, меѓу кои едно дете и еден германски државјанин, се спасени од планината Водно, откако останаа заглавени поради лошите временски услови и прекинот на електрична енергија на жичарата.
Како што соопшти Министерството за внатрешни работи (МВР), првичната пријава околу 16 часот била за заглавени лица во гондола. Иако струјата потоа дошла и лицата стигнале до врвот на Водно, тие не можеле да се спуштат поради невремето и повторното снемување на електрична енергија.
„Веднаш по добиената пријава полициски службеници од ЕИП и ЕБР преземаа активности за пронаоѓање и спасување на лицата, по што тие безбедно, во придружба на полициските службеници се спуштаат кон Скопје“, се вели во соопштението од МВР.
Во спасувачката акција учествувале полициски службеници од Единицата за интервентна полиција (ЕИП), Единицата за брзо распоредување (ЕБР) и одделението за безбедност на патниот сообраќај при СВР Скопје.