Владејачките партии во Германија се согласија за нов модел на воена служба, комбинирајќи ја доброволната служба со можност за задолжителна регрутација доколку безбедносните потреби го бараат тоа, соопштија во понеделник германските коалициски партнери.
Договорот го постигнаа конзервативците на германскиот канцелар Фридрих Мерц и социјалдемократите (СПД), објави Ројтерс.
Според предложениот план, сите 18-годишници ќе добијат прашалник за нивниот интерес за воена служба.
Ќе се воведе и систем на регистрација и медицински прегледи, почнувајќи од генерацијата родена во 2008 година.
Доброволните регрути ќе добиваат месечна плата од 2.600 евра, а секоја задолжителна регрутација ќе биде предмет на посебно гласање во Бундестагот.
Германија имала речиси 500.000 војници за време на Студената војна, но бројот на силите е намален во мирно време.
Денес, Бундесверот има околу 182.000 војници, а владата планира да го зголеми тој број на помеѓу 255.000 и 270.000, со дополнителни 200.000 резервисти.
Мерц вети дека Германија ќе изгради „најсилната конвенционална армија во Европа“, наведувајќи ги растечките закани од Русија и притисокот на САД врз Европа да преземе поголема одговорност за сопствената одбрана.