Министерството за спорт до крајот на годината ќе започне три големи инфраструктурни проекти – изградба на две нови спортски сали и реконструкција на спортската сала во комплексот на Универзитетот „Св. Кирил и Методиј“ (УКИМ) во Скопје.
Веста ја соопшти министерот за спорт, Борко Ристовски, во гостување во емисијата „Студио 10“ на ТВ 24, нагласувајќи дека овие проекти ја заокружуваат година во која новоформираното Министерство за спорт бележи значајни резултати, особено во делот на изградба и реконструкција на спортска инфраструктура низ целата држава.
„Реконструкцијата на спортската сала во комплексот на УКИМ е многу важна и за образованието и за спортот, бидејќи оваа сала веќе десетина години стои неупотреблива, како вистинска руина. По комплетната реконструкција, над 4.000 студенти ќе можат да се бават со спорт и да ги реализираат часовите по физичко образование во современ и безбеден спортски објект,“ изјави Ристовски.
Освен реконструкцијата на салата на УКИМ, до крајот на годината ќе се постават темелите и ќе почне изградбата на нова спортска сала во населбата Аеродром (кај објектот на ФФМ) во Скопје, како и нова спортска сала во Крушево, со која градот треба да прерасне во регионален спортски центар за подготовки.
„Истражувањата покажаа дека националните спортски федерации трошат над еден милион евра годишно за подготовки во странство. Со изградба на современ спортски центар во Крушево, во близина на спортски хотел и планински терени, тие средства ќе останат во државата. Крушево ќе стане регионален центар за подготовки – не само за македонските екипи, туку и за тимови од целиот регион,“ истакна министерот.
Во рамките на програмата за спортска инфраструктура, во последните 15 месеци се изградени и реконструирани над 40 мултифункционални спортски центри низ земјата, со цел рамномерна регионална распределба и достапност на спортот за сите граѓани.