Од Зелениково до центарот на Скопје ќе се стигнува за 25 минути, а од Драчево за само 11 минути, предвидува проектот за градски воз чија прва фаза започна денеска.
Клучно за успехот на проектот ќе биде да се направи перфектна синхронизација на возниот ред на возот со автобусите од градскиот сообраќај, за патниците да можат веднаш да бидат прифатени и превезени до други дестинации низ градот.
Директорот на Железници транспорт Синиша Ивановски, градоначалникот на Скопје, Орце Ѓорѓиевски и министерот за транспорт Александар Николовски, денеска беа на увид во Драчево, каде започнаа работите на првата делница, од Зелениково до Железничката станица во Скопје.
– Промовираме два паралелни проекта коишто се од круцијален интерес за инфраструктурата на железници во македонија. Едниот е почетокот на ремонтот на градскиот воз, којшто е од есенцијално значење, пред сѐ за транспортот за градот Скопје… Веќе сме во тек со целосен ремонт на првата фаза на градскиот воз – рече Ивановски.
Тој најави и дека следната година ќе се обновува железничката врска од Волково до Железничката станица, а потоа и онаа до Илинден и Миладиновци. Ивановски го истакна и значењето на пругата од Драчево до Иленден, која е важна за товарниот железнички превоз.