СДС доживеа историски пораз. Некогаш големата СДС и наш главен опонент, денес е трета партија во државата и петта во главниот град. Венко Филипче под диктат на Зоран Заев ја доведе партијата до целосен пад, без визија, без стратегија и без доверба кај граѓаните, рече на денешната прес-конференција Валентин Манасиевски, член на ЦК на ВМРО-ДПМНЕ
Резултатите се јасен показател дека народот ја казни нивната ноншалантност и аздисаност. Со освоени само 6 општини, 126.000 гласови и околу 230 советници, СДС го изгуби она што некогаш беше нејзина најголема предност, а тоа е поддршката во средините каде некогаш доминираше, истакна Манасиевски.
Манасиевски посочи дека во СДС нема реформи, туку само обиди за спас на поединци и криeње на вистинскиот виновник за поразот, Венко Филипче. Оставките без суштина не се решение, само одложување на неизбежното, а тоа е потребата од целосна промена во врвот на партијата, на чело со Филипче.
„Очигледно е дека СДС и натаму функционира под диктат на Зоран Заев. Филипче ниту се дистанцираше од него и неговите политики, ниту покажа капацитет да ја врати партијата на вистински пат.
Ако за Филипче ова е одличен резултат, тогаш ние му се честитаме. Но, вистината е дека под вакво раководство СДС ќе продолжи да тоне.
На Македонија и е потребна вистинска опозиција, а тоа нема да се случи без оставка на Филипче и реформи во СДС“, истакна Манасиевски.