Советот на јавните обвинители, Јавното обвинителство и Здружението на јавните обвинители бараат Уставниот суд итно да се произнесе за законските измени со кои по третпат беа намалени коефициентите за пресметување на платите на јавните обвинители и членовите на Советот.
Од Здружението на јавните обвинители изразуваат загриженост што повеќе од осум месеци нема конечна одлука по поднесените иницијативи за оценување на уставноста на измените. Според нив, одложувањето отвора прашања за самостојноста на обвинителството и создава нерамноправност во однос на судската функција.
Како аргумент го посочуваат и претходното решение на Уставниот суд со кое е поведена постапка за оценување на законските одредби. Во него, според обвинителите, е изразен сомнеж дека намалувањето на коефициентите може да ја загрози уставно загарантираната самостојност на јавното обвинителство и правото на соодветна заработувачка.
Од обвинителската фела предупредуваат дека ниските плати, недостигот од кадар, ограничениот буџет и несоодветните услови за работа дополнително го отежнуваат функционирањето на институцијата. Тие сметаат дека ваквата состојба може да предизвика одлив на обвинители и да се одрази врз заштитата на правата на граѓаните.
Воедно, посочуваат дека платите на јавните обвинители во земјава се меѓу најниските во регионот и очекуваат проблемот да биде нотираn и во претстојниот извештај на Европската комисија.
Од институциите и здружението бараат Уставниот суд да ги разгледа аргументите и доставените компаративни анализи и да донесе одлука за оспорените законски измени.