Без Бугари во Уставот за Македонија нема европска иднина, ни порача Брисел и во последниот извештај кој вчера го објави Европската Комисија. Тие се повикуваат на обврските кои претходната Влада ги презема кога го потпиша францускиот предлог констатирајќи дека земјава не презела, како што се вели во извештајот „одлучни чекори“
Комисијата во извештајот посочува дека земјава продолжила со целосно усогласување со заедничката надворешна и безбедносна политика на ЕУ, што сведочи за нејзиниот стратешки избор, но дека се потребни понатамошни брзи и решителни активности во однос на одредниците за старт на преговорите во согласност со Преговарачката рамка
Во заклучоците, ЕК потенцира дека земјава треба дополнително да работи на зајакнување на борбата против корупцијата и организираниот криминал.
Премиерот Мицкоски беше во Брисел каде ги презентираше македонските позиции и загриженоста дека уставните измени нема да бидат последното условвување од Бугарија, предупредувајќи дека практиките на официјална Софија може да ги следат и други земји членки.
На состанокот апсолутно ги повторивме нашите единствени позиции кои што навистина се позиции достоинствени после сите оние понижувања кои што ни се случија во минатото, изминатите 25 години откако практично почна овој наш пат кон приближување кон Европската Унија. Покрај приближувањето кон ЕУ и отпочнувањето на преговорите, имаше уште неколку проекти кои што се за нас стратешки важни, тоа е гасниот интерконектор со Србија и крак на гасниот цевковод кон соседно Косово. Понатаму, тарифите за челикот и челичните производи на македонските производители, како и заедничкиот проект што нашата македонска Влада ќе го има со Европската комисија, а се однесува на проектите кои што треба да ги реализираме во Кочани и во кочанскиот регион, вели Мицкоски.